വ്യോമയാന മേഖലയിൽ സൗദി അറേബ്യയുമായും യുഎഇയുമായും കരാർ ഒപ്പിട്ട് കാനഡ

 

വ്യോമയാന മേഖലയിൽ സൗദി അറേബ്യയുമായും യുഎഇയുമായും കരാർ ഒപ്പിട്ട് കാനഡ. പുതിയ കരാറുകൾ പ്രകാരം ഇരു രാജ്യങ്ങൾക്കുമിടയിൽ കൂടുതൽ യാത്രാ വിമാനങ്ങൾക്കും ചരക്ക് വിമാനങ്ങൾക്കും സർവീസ് നടത്താൻ സാധിക്കും. ഇത് കാനഡക്കാർക്ക് കൂടുതൽ യാത്രാ സൗകര്യങ്ങൾ ഒരുക്കുന്നതിനൊപ്പം ടിക്കറ്റ് നിരക്ക് കുറയാനും കാരണമായേക്കും. ട്രാൻസ്‌പോർട്ട് മന്ത്രി സ്റ്റീവൻ മക്കിന്നനും അന്താരാഷ്ട്ര വ്യാപാര മന്ത്രി മനീന്ദർ സിദ്ധുവും ഒട്ടാവയിൽ വെച്ചാണ് ഈ പ്രഖ്യാപനം നടത്തിയത്. ഈ നീക്കം മിഡിൽ ഈസ്റ്റുമായുള്ള കാനഡയുടെ സാമ്പത്തിക, സാംസ്കാരിക ബന്ധങ്ങളെ ശക്തിപ്പെടുത്തുമെന്ന് അവർ പറഞ്ഞു.

പുതിയ കരാറുകൾ വ്യാപാരങ്ങൾക്കും നിക്ഷേപങ്ങൾക്കും ഉത്തേജനം നല്കും. അതിർത്തികൾ കടന്നുള്ള ചരക്ക് നീക്കം ഇത് കൂടുതൽ എളുപ്പമാക്കും. കൂടുതൽ വിമാന സർവീസുകൾ ആരംഭിക്കുന്നത് ടൂറിസം മേഖലയെയും ശക്തിപ്പെടുത്തും. ലോകമെമ്പാടുമുള്ള നൂറിലധികം രാജ്യങ്ങളുമായി കാനഡയ്ക്ക് നിലവിൽ വ്യോമയാന കരാറുകളുണ്ട്. ഇത്തരം കരാറുകൾ വിപുലീകരിക്കുന്നത് കാനഡയുടെ വ്യാപാരം വൈവിധ്യവത്കരിക്കാനും ചില പ്രത്യേക വിപണികളെ മാത്രം ആശ്രയിക്കുന്നത് കുറയ്ക്കാനും സഹായിക്കുമെന്ന് അധികൃതർ പറയുന്നു. ഇത് രാജ്യത്തിൻ്റെ ദീർഘകാല വളർച്ചയ്ക്കും സാമ്പത്തിക സ്ഥിരതയ്ക്കും ഗുണകരമാകും. വ്യോമയാന നിയമങ്ങൾ ആധുനികവൽക്കരിക്കാനും മത്സരത്തെ പ്രോത്സാഹിപ്പിക്കാനും ലക്ഷ്യമിട്ടുള്ള കനേഡിയൻ സർക്കാരിൻ്റെ തന്ത്രത്തിൻ്റെ ഭാഗമായാണ് പുതിയ കരാറുകൾ.